BANCALES

Os bancais das viñas de Rogelio Moral son dos que subes unha e outra vez e non cansas, teñen vida e transmiten emoción a cada paso que das, non é difícil que saian destes bancais acios dispostos a darche toda a enerxía creada neles, pois entre bancal e bancal, acio a acio constrúese cada botella que lembra en cada grolo todos e cada un dos pasos que fomos dando entre os bancais , cada grolo un bancal, cada cepa unha botella.

Bio

Hai familias que levan escritas na fronte as gañas os esforzos e até os golpes que levaron para sacar adiante os seus proxectos vitais, unha xeración despois de outra, afamilia Moral é unha desas cando os ves e falas con eles xa sabes que na superficie non vas sacar nada, vas ter que sachar ao seu carón para descubrir a infinita xenerosidade e sapiencia que acumularon cos anos.

Logo están os viños que recollen todos eses anceios, pero sempre hai un na bodega que tenta ser a prolongación do mellor que levamos dentro, sen dúbida este bancales Moral non tería outra definición máis acaída, durante moitos anos foi o acompañante imprescindible de Rogelio nas súas viaxes e estancias na Emigración.

Viño límpido e brillante, unha mezcla perfecta entre a froita e a madeira, froita roxa exhuberante e fresca que é complementada polo paso por barrica que apenas lle aporta matices especiados en nariz e profundidade e persistencia na boca, o seu ribete granate mostranos o repouso e a madurez. Por último non podemos esquencer a súa mineralidade, procedendo de bancais roturados en terra de pizarra, as aportacións son suxerentes e culminan este bancales con moita elegancia e sabor no padal.

Se queredes darvos un paseo por Valdeorras ulir os seus aromas e degustar as súas golosas terras non tedes máis que abrir unha botella con tempo e en boa compaña e deixarvos levar polas sensación do Bancales Moral.